ఆంధ్రప్రదేశ్‌లో సగటు సామాన్యుడు, పేదవాడు పూట గడవడం గగనంగా మారుతోంది. “బాబు వస్తే జాబు వస్తుంది.. సంక్షేమం వర్ధిల్లుతుంది” అంటూ ఎన్నికల ముందు ఊదరగొట్టిన నినాదాలు, నేడు ఆకలి కేకలుగా మారుతున్నాయనే విమర్శలు వెల్లువెత్తుతున్నాయి. నిత్యం తినే అన్నం మెతుకుపై చంద్రబాబు నాయుడు మార్క్ అడ్మినిస్ట్రేషన్ చూపిస్తున్న ప్రభావం పేదవాడిని కోలుకోలేని దెబ్బ తీస్తోందని క్షేత్రస్థాయి పరిశీలనలు స్పష్టం చేస్తున్నాయి.
వైఎస్ జగన్ ప్రభుత్వ హయాంలో ఒక బియ్యం బస్తా ధర సగటున 1300 రూపాయలుగా ఉండేది. పేద, మధ్యతరగతి కుటుంబాలు తమ నెలవారీ బడ్జెట్‌లో ఆహార ధాన్యాల కోసం పెద్దగా ఆందోళన చెందాల్సిన అవసరం రాలేదు. కానీ, కూటమి ప్రభుత్వం వచ్చి చంద్రబాబు ముఖ్యమంత్రి పీఠం ఎక్కిన కొద్ది నెలల్లోనే అదే బియ్యం బస్తా ధర ఏకంగా 2300 రూపాయలకు చేరింది. కేవలం కొన్ని నెలల వ్యవధిలోనే వెయ్యి రూపాయల మేర పెరగడం చంద్రబాబు ప్రభుత్వ నియంత్రణ వైఫల్యానికి నిదర్శనం.
ధరల కట్టడిలో ఈ దారుణ వైఫల్యం వల్ల సామాన్యుడు నాలుగు వేళ్లు నోట్లోకి పోవడమే కష్టంగా మారింది. రోజువారీ కూలీలు, మధ్యతరగతి జీవులు సంపాదించే సంపాదన అంతా కేవలం బియ్యం కొనడానికే సరిపోతుంటే, ఇక కుటుంబ పోషణ, పిల్లల చదువులు, వైద్యం ఎలా సాధ్యమనే ప్రశ్నలు తలెత్తుతున్నాయి. కూడు, గూడు, గుడ్డ కల్పించాల్సిన ప్రభుత్వమే.. ప్రాథమిక అవసరమైన కూడును దూరం చేసేలా ధరలను పెంచేసిందా అనే ఆగ్రహం జనం నుంచి వ్యక్తమవుతోంది.
“బాబు వస్తే పేదవాడు కష్టాలపాలు అవుతాడు.. సామాన్యుడు చితికిపోతాడు” అని ప్రతిపక్షాలు గతంలో హెచ్చరించిన మాటలు నేడు అక్షరాలా నిజమవుతున్నాయి. చంద్రబాబు నాయుడు చెప్పే సంక్షేమం, ప్రగతిశీల అభివృద్ధి ఇదేనా అంటూ ప్రజలు నిలదీస్తున్నారు. అభివృద్ధి అంటే కార్పొరేట్ శక్తులకు మేలు చేయడం కాదు, పేదవాడి కడుపు నింపడం అనే కనీస సూత్రాన్ని ప్రస్తుత పాలకులు విస్మరించారనే విమర్శలు వస్తున్నాయి.
అన్నం ఉడికిందో లేదో చెప్పడానికి ఒక్క మెతుకు పట్టుకుంటే చాలు. అలాగే, చంద్రబాబు అడ్మినిస్ట్రేషన్ ఎంత చెత్తగా ఉందో, ఎంత దారుణంగా వైఫల్యం చెందిందో చెప్పడానికి ఈ బియ్యం ధరల విపరీత పెరుగుదల ఒక్కటి చాలు. ధరలను అదుపు చేయలేని, బ్లాక్ మార్కెట్‌ను అరికట్టలేని ఈ పాలనా విధానం వల్ల రాష్ట్రంలో ఆర్థిక అసమానతలు పెరిగి, పేదవాడు మరింత పేదరికంలోకి కూరుకుపోయే ప్రమాదం కనిపిస్తోంది. ఇప్పటికైనా ప్రభుత్వం కంటితుడుపు చర్యలు పక్కనబెట్టి, బియ్యం సహా అన్ని నిత్యావసర వస్తువుల ధరలను నియంత్రించకపోతే ప్రజాక్షేత్రంలో తీవ్ర నిరసనలు తప్పవు.
