న్యూఢిల్లీలో జరిగిన చిన్మయ అమృత్ మహోత్సవ్ గ్లోబల్ సమ్మేళనంలో ప్రధాని నరేంద్ర మోదీ, 1993లోనే సిద్ధి పొందిన పూజ్య శ్రీ స్వామి చిన్మయానంద సరస్వతి ఏఐ-ఆధారిత 3D హోలోగ్రామ్ అవతార్‌తో ముఖాముఖి సంభాషించడం ఇప్పుడు దేశవ్యాప్తంగా ఒక సంచలనంగా మారింది. దశాబ్దాల క్రితం భౌతికంగా దూరమైన ఒక మహోన్నత ఆధ్యాత్మిక గురువును కృత్రిమ మేధ సాయంతో పునఃసృష్టించి, సరికొత్త తరానికి వారి జ్ఞానాన్ని అందించాలనే ఈ అద్భుత ప్రయత్నం ఒకవైపు ప్రశంసలు అందుకుంటుండగా, మరోవైపు దీనిపై సోషల్ మీడియా వేదికగా తీవ్రస్థాయిలో పొలిటికల్ రచ్చ, డిబేట్ నడుస్తోంది.
ఈ హోలోగ్రామ్ ప్రదర్శన వెనుక ఉన్న ప్రధాన సానుకూల కోణం… భారతదేశ సాంస్కృతిక, ఆధ్యాత్మిక వారసత్వాన్ని రాబోయే తరాలకు అద్భుతంగా అందించడం. పుస్తకాలు, ఆడియోలకే పరిమితమైన స్వామి చిన్మయానంద గారి వేదాంత బోధనలను, నేటి డిజిటల్ తరం యువతకు కనెక్ట్ అయ్యేలా ఏఐ సాంకేతికత ద్వారా సజీవంగా చూపించడం విప్లవాత్మక మార్పు. సాంకేతికతను కేవలం వాణిజ్య అవసరాలకే కాకుండా, దేశ సంస్కృతిని కాపాడటానికి వాడుకోవచ్చని ప్రధాని మోదీ ప్రపంచానికి చాటిచెప్పారు.
ఈ సంభాషణలో ప్రధాని మోదీ చూపిన వినమ్రత, భక్తిభావం కోట్లాది మంది భారతీయులను కదిలించాయి. మహోన్నత గురువుల పట్ల దేశ ప్రధానికి ఉన్న గౌరవాన్ని ఇది ప్రతిబింబించింది. “భారతదేశం నీతోనే ఉంది” అంటూ ఆ ఏఐ రూపం పలికిన మాటలు, దేశాన్ని ప్రగతి పథంలో నడిపిస్తున్న నాయకత్వానికి డిజిటల్ రూపంలో లభించిన ఒక ప్రేరణాత్మక ఆశీర్వాదంగా భక్తులు భావిస్తున్నారు.
ఈ ప్రాజెక్ట్ ఇంతటి పాజిటివ్ వైబ్‌ను క్రియేట్ చేసినప్పటికీ, దీని చుట్టూ ఇప్పుడు నెటిజన్లు, విమర్శకుల మధ్య పెద్ద యుద్దమే నడుస్తోంది. చనిపోయిన ఒక మహోన్నత ఆధ్యాత్మిక గురువు నోటి వెంట, ఒక రాజకీయ నాయకుడికి అనుకూలంగా స్పెషల్ స్క్రిప్ట్ రాయించి పలికించడం ప్రచార పరాకాష్ట అని కొందరు మండిపడుతున్నారు. ఆధ్యాత్మిక పవిత్రతను రాజకీయ ఇమేజ్ బిల్డింగ్ కోసం వాడుకుంటున్నారని ఆరోపిస్తున్నారు.
ఇందులో ఎలాంటి రాజకీయం లేదని, ఒక గ్లోబల్ లీడర్‌గా ఉన్న ప్రధాని మోదీకి దేశాన్ని నడిపించే క్రమంలో ఏఐ గురువు ద్వారా లభించిన డిజిటల్ బూస్టింగ్ ఇది అని కౌంటర్ ఇస్తున్నారు. కాలంతో పాటు మారుతూ టెక్నాలజీని వాడటంలో తప్పులేదని సమర్థిస్తున్నారు.
మార్పును వ్యతిరేకించే వారు విమర్శలు చేయడం, దానిపై రచ్చ జరగడం సహజం. కానీ టెక్నాలజీ మరియు స్పిరిచువాలిటీని అనుసంధానించిన ఈ ఘట్టం భవిష్యత్తు డిజిటల్ ఇండియాకు ఒక దిక్సూచిగా నిలుస్తుంది. నవభారత డిజిటల్ విప్లవంలో ఇదొక మైలురాయి అని చెప్పడంలో ఎలాంటి సందేహం లేదు.
